"Al Oudor Desta Canela...", a porpósito de ls númaros de ls Censos 2021
Las maleitas de muitas tierras de Pertual nun son solo cousa d’agora. Bonda ber l que Francisco Sá de Miranda, un poeta pertués de l seclo XVI, screbiu yá nesse tiempo:
Nun me temo de Castielha,
donde inda guerra nun sona;
mas temo-me de Lisboua,
q’al oudor desta canela,
l Reino mos çpobloua..."
"A António Pereira, Senhor do Basto, Quando Se Partiu Para a Corte Co'a Casa Toda" in Sá de Miranda, Poesia e Teatro, Editora Ulisseia, 1989, pág. 215.
Claro stá que la canela i las outras speciaries trazidas de fuora i de bien loinje, d'alhá de las tierras de l Ouriente, éran la maior riqueza d'anton. Ls luxos i l'oupuléncia de la Corte éran yá nesse tiempo un chamariç i ũa rezon subreciente para atrair i arrebanhar pessonas amportantes doutros sítios pa Lisboua. Bendo, assi, muitas pessonas a salir i a deixar al abandono l restro de l Reino, Sá de Miranda ampeçou a preacupar-se i a arrecear pul feturo de Pertual.
Hoije, la canela ye outra: l denheiro. Lisboua – ye cumo quien diç, la capital de Pertual adonde stá l Goberno de l Paíç –, amanha mil i ũa maneiras de, a tuorto i a dreito, sacar la riqueza pa la cuncentrar toda na capital. Assi, atrai pa lhá i saca de las restrantes tierras de Pertual la sue maior riqueza: las pessonas, subretodo las mais sabidas, sclarecidas i mais nuobas.
Passados cinco seclos, parece que, ne l nuosso tiempo, ls gobernos de l Pertual cuntínan a eimitar la antiga Corte. Cul Paíç derreado de díbedas i l pobo a bibir sabe Dius cumo, porta-se de la mesma maneira de ls reis i de la Corte d'antigamente: ls mesmos luxos, baidades, bícios, troca de fabores, anfluéncias..., manhas i manias de gente rica que s'habituou a bibir na oupuléncia i que nun s'amporta nin s'ambergonha d'andar a pedir denheiro amprestado a quien calha pa l gastar ne l que le dá na gana!
Nun admira q'assi, Pertual cuntine a tener tan mala reputaçon que quaije se le puode aplicar l que se dezie nun reclame dũa buída que, hai ũas dezenas d'anhos, passaba na telbison: ..., la fama que ben de loinje!
Se tenemos porblemas acá dentro, la seluçon – cuidában eilhes – serie irmos para fuora pa ls resolber. Mas cunquistar Ceuta i outras cidades de l norte d'África de nada mos baliu; ls maiores ganhos cul comércio de las speciares fúrun pa la Frandes; l ouro i l sucre de l Brasil tamien de nada mos serbírun; oumenos parte de las debisas mandadas puls nuossos eimigrantes ne ls países de l centro de l'Ouropa fúrun pa aguantar ls gastos de la guerra nas colónias; parte de l denheiro de ls fondos ouropeus fui zbiado para luxos, bancos i paraísos fiscales i l restro de la maquila aplicado na capital i nas cidades i bilas a la beira-mar.
Réstram-mos, assi, algũas preguntas ancómodas: quando s'acabáren ls fondos ouropeus, adonde i a quien será que Pertual bai a pedir ou a sacar denheiro?! Quando la maior parte de las poboaçones de l Anterior de l Paiç quedáren sin naide l que bamos a fazer a mais de dous tércios de l território de l Cuntinente?! Ou será que, pori, Pertual inda cai al mar?
S’antes de l 25 de Abril de 1974 las pessonas de l pobo tenien q'abandonar las sues tierras i salir de Pertual para amanhar melhores cundiçones i modos de bida i, subretodo a seguir a la antrada de l Paíç na Ounion Ouropeia, ls mais nuobos, seia pa studar ou pa trabalhar, cuntínan a scapar para donde sínten chegar l oudor de la nuoba canela.
Mas nun cuideis que ye só Lisboua!...
Fuora de la capital, quien manda nas cidades i bilas nun ten mais: pon-se a eimitar i a fazer l mesmo que ls de Lisboua. Las cidades sácan las pessonas de las bilas i aldés al sou redor; las bilas sácan las pessonas de las aldés a la sue buolta. Assi, l que ye que restrará nas poboaçones mais pequeinhas?
Anton, estas poboaçones quédan quaije sin naide, senó ls mais bielhos i que l tiempo s’ancargará de ls lhebar pa ls lares i, pouco apuis, pa debaixo de la tierra. Quando todos eilhes se morríren, l que restrará alhá? La paç i l silenço de ls cemitérios, la rúina de las casas i de las rues i las sues tierras por cultibar, abandonadas i chenas de mato.
Recanto d'Angueira, porriba de la Mediana i cerca de la Salina, adonde morában famílias que, na sigunda metade de l seclo passado, scapórun pa l Brasil, pa la Fráncia i pa la Spanha.
Esta parece ser la triste sina de las poboaçones de l Anterior, subretodo daqueilhas que quédan mais loinje de la capital i mais loinje de l mar. Zafertunadamente, ye l que, deç l seclo passado, se ten benido a passar ne l Nordeste Trasmuntano i, specialmente, na(s) Tierra(s) de Miranda, ou seia, ne ls cunceilhos de Bumioso, Mogadouro i Miranda de l Douro. Apuis de muita de la sue gente se tener scapado pa l Brasil, pa la Argentina, pa la Benezuela i outros países de l'América i, de seguida, pa la Fráncia, Almánia i outros países de l'Ouropa, ls gobernos de l Paiç ancerrórun-le las lhinas de l camboio, scolas, centros de salude i outros Serbícios Públicos i quaije que l'acabórun cula lhaboura. Dórun, assi, mais un amporrionico pa que la gente nuoba las abandonasse.
Se, ne l seclo XVI, l çpoblamiento de l Paiç era mui preacupante, ne l seclo XXI, l çpoblamiento de las tierras de l Anterior ye mesmo alarmante!...
Para ber cumo la situaçon ye preacupante, bonda ler...
"Vivemos cada vez mais (...) em cidades grandes do litoral: 74% da população aglomera-se, por vezes em condições precárias e sem qualidade de vida, em apenas 2,4% do território. No mais, Portugal, ao contrário do que tantas vezes julgamos, permanece um país quase totalmente rústico, em 94% da sua área. (...) só uma parte dessa terra é efectivamente aproveitada para fins agro-silvo-pastoris. Cerca de 23% do Portugal rústico é composto por matos e incultos."
Rodrigo Sarmento de Beires et al. (2013), O Cadastro e a Propriedade Rústica em Portugal, Fundação Francisco Manuel dos Santos, Lisboa, pps. VII-VIII. In https://www.academia.edu/.../O_Cadastro_e_a_Propriedade_R... (sítio de la Anternet, cunsultado an 25/07/2021).
...i ber inda las últimas nobidades:
"As únicas regiões em que foi registado um crescimento da população entre 2011 e 2021 foram o Algarve (3,7%) e a Área Metropolitana de Lisboa (1,7%). Já as restantes regiões do país "viram decrescer o seu efetivo populacional (...).
(...) o INE concluiu que, na última década, o país acentuou o padrão de litoralização e reforçou o movimento de concentração junto da capital. "A análise por município permite verificar que os territórios localizados no interior do país perdem população, sendo que os municípios que assistiram a um crescimento populacional situam-se predominantemente no litoral, com uma clara concentração em torno da capital do país e na região do Algarve"".
Pa quedardes a saber l stado a que, an termos de perda de populaçon, chegórun ls trés cunceilhos de Bumioso, Miranda de l Douro i Mogadouro, mas tamien todos ls outros cunceilhos de l Nordeste Trasmuntano i de l Anterior de Pertual, bonda cunsultar ls dados de ls Censos 2021 ne l sítio de l INE na Anternet.
Bede bien l que, antre 2011 i 2021, se passou ne ls cunceilhos de la(s) Tierra(s) de Miranda:
Bendo cun uolhos de ber estes númaros i se ls cumpararmos culs de ls Censos de la sigunda metade del seclo passado i de l ampercípio deste seclo (1960, 1970, 1981, 1991 i 2001) solo mos restra dezir: ũa lhástima, ũa outéntica calamidade demográfica! Se cumpararmos tamien la populaçon de ls trés cunceilhos an 2021 (18 934) cun la de la freguesia de "Braga - São Vítor", adonde moro (32 822), bemos que pouco le falta para qu'esta freguesia solica tenga l dobro de moradores de ls de ls cunceilhos de la(s) Tierra(s) de Miranda todos juntos.
Se, ne l passado, ls gobernos nada fazírun i, hoije, cuntínan a pouco fazer, tenemos, anton, que, para bien (la Justícia i até pa la Defénsia) de Pertual, sermos nós a fazer l que stubir nas nuossas manos i al nuosso alcance para ajudar a resolber tan grabe porblema.
Para antendermos melhor las nuossas registéncias, deixai que bos diga l que, hai yá alguns anhos, l senhor Aran Steba, l único home nacido, criado i que siempre bibiu an Angueira i passou de 100 anhos de bida, cuontaba a quien le quegisse çcuitar:
Antigamente, acabado o desmame do príncipe herdeiro, o rei ordenava ao cozinheiro que lhe misturasse e ministrasse uma pequena dose de veneno na comida e que, à medida que o príncipe crescesse, lhe fosse aumentando e ajustando a dose.Assim, quando lhe tocasse a ele reinar, se o envenenassem, o novo rei, habituado a reagir ao veneno, estaria, certamente, em condições de sobreviver ao envenenamento.
Cumo el, somos lhebados a suponer ou a feturar l que se passará cun las pessonas que nacírun ou, inda nuobas, scapórun, quedórun i s’habituórun a bibir na capital i noutras cidades. Ampeçando deç nuobicas a respirar essa sustáncia q’alhá hai a la farta, quando chegáren a adultas sentiran que les fai falta, que nun poderan passar nin mesmo bibir sin eilha.
Será que, cun nós i cun muitas outras pessonas, nun se passará l mesmo ou cousa parcida?
Aconselho as pessoas menos familiarizadas com a Língua Mirandesa a ler o texto a meia voz, o que poderá ajudar a entendê-lo mais facilmente. Caso queira ler outros textos em Mirandês, pode aceder ao meu blogue: https://angueira.net/
