Ls que me síguen más d’acerca, sáben que balorizo muito las “cousas que nun sírben para nada”, mas esso son outras cuontas.
Naci nun tiempo i nun sítio adonde l’Eidade Média durou quaije até la fin de l terceiro quartel de l seclo XX. Fiç-me home nesse sistema.
Miu pai i mie mai éran campesinos, cumo campesinos éran ls nobenta i nuobe por cien de las pessonas de l’aldé i de la Tierra de Miranda.
La maiorie de la giente d’hoije nun tenerá muita anformaçon subre l que ye la cibilibizaçon de l campesinato: mas eilha fui global i durou más de mil anhos.
An Pertual stendiu-se antre la guerra de la recunquista cristiana q’ampeçou por buolta de l anho 700 ne l seclo VIII i 1980 ne l seclo XX. Hoije, pa l mal i pal bien, somos l que somos, porque essa sociadade mos trouxo até eiqui.
Fui nesse sistema cibilizacional que nacírun la quaije totalidade de las nuossas aldés.
Un lhugar medraba aquanto centro de sigurança dun termo que l’arrodiaba. Drento desse termo la quemunidade q’alhá moraba era outárcica: quaije nada antraba, quaije nada salie. Bastában-se a si própios cul que tenien i produzien. Habie tiempos de más penúria i outros de más zafogo, cunsante ls anhos benien más al modo, ou más madraços! Era buono q’houbisse un pouco de sobras q’apuis se trocarien por fierro para fazer las ferramientas de trabalho.
Un campesino habie de tener un pouco de todo, porque d’un pouco de todo percisaba para fazer passar l anho a la sue família alargada: cereales, castanha i más tarde la patata - heidratos de carbono cumo base alimentar; chicha de ls animales que criaba i caçaba cumo proteiína; lheinha cumo einergie que la casa percisaba; stierco cumo fertelizante; animales de porte cumo fuorça de traçon; huorta de begetales i alguns fruitos cumo cumplemento de dibersidade alimentar; azeite cumo gordura begetal i l bino cumo droga social. Tamien ls animales que criaba i ls begetales que plantaba le fornecien lheite, pieles i las fibras que percisaba, para fazer queiso, cuiro i ls sous agasalhos: la lhana i l lhino. I todo era perciso guardar, tresformar i cunserbar, durante to l anho, para que nada faltasse até la próssima colheita: tulhas lhibres d’houmidades i de lhuç; cochino i baca curados cun çurça i sal. Oubeilhas, cabras, pitas, parrecos, coneilhos i perus bibos para matar quando fusse perciso.
Todo habie de tener ua funçon bien cuncreta, para que nun se stubisse a criar cousas que díssen más prejuízo que ganáncia: cuontas de sustentablidade. Ye eiqui q’éntran perros i gatos. Anquanto ls purmeiros assegurában funçones de caça i guarda de l ganado, ls sigundos oucupában-se de la maior peste que poderie haber drento dua casa chena de comida: ratos i lheirones. Ls carinos trocados cun todos ls animales de la casa yá s’íban assomando a la jinela, mas inda nun oucupában la parte central de la relaçon.
Cumo an to las famílias, an casa de mius pais habie de todos esses animales: mulas, burros, pitas, perus, coneilhos, perros, gatos i mil garabatos. Estes últimos nunca percebi l que éran, mas habien de ser ls ratos, lheirones, chiçmes, percebeijos, sanchas, caruncho, pulhilha, lhumbrizes, pulgas i piolhos, porque éran mesmo muitos!
Claro q’anquanto fui nino, sobretodo ls perros i gatos, más a más quando éran pequerricos, m’ancantában. Mas lhougo la racionalidade de ls pais mos ponie a fierro de lhetra:
- L lhugar dessa criaçon ye na rue i ne l palheiro i a coméren l que sobrar apuis de todos habéren comido: uossos, spinas, pieles i algue lhabaraige cua códea dundiada que ls cochinos bien comerien.
Ls tiempos mudórun, porque l mundo nunca perdiu essa antiga mánha de rodar to ls dies.
L miu filho conheciu por pouco la cibelizaçon de l campesinato, i agora, cumo todos nós, fai parte de la cibilizaçon global. Bibe el, ua rapaza i la sue perra Xara, nun sesto andar an Madriç.
Quando ben a nuossa casa trai siempre la perra, i mie cunhada Adília que ye nuossa bezina i nunca deixou de bibir na sociadade de l campesinato, pergunta-le:
- À Thibaut, la perra ye mui galana, mas para que quieres tu essa muxinga: to ls dies a papar, a cagar i a mijar an casa, sien dar lucro nanhun. Nun tenies tu la culpa! Se te fudiras?
- Esto ye un ganado d’afetos Adília. Fai-mos muita cumpanhie . Dá-mos muitos carinos i alegries. Responde-le l miu filho.
- Ganado d’afetos! Nunca an dies de mie bida habie oubido semelhante cousa!? Esso nun sirbe para nada Thibaut. Inda se fura un cochinico cumo l que you tengo na corteilha!
Será por bibirmos an maior zafogo que las cousas eibiluírun desta maneira? Será porque las pessonas hoije percísan más d’afetos? Será porque ls perros i gatos d’hoije stan an melhores cundiçones para dar estes afetos?
I nas democracies modernas setores de la política dedícan-se a cunquistar l manantial de ls botos que bénen desse setor.
I las reportaiges de las guerras d’hoije atéstan que puodes deixar todo para trás, mas l ganado d’afetos, ten que seguir cun cada un de ls refugiados até adonde seia perciso!
Cousas que parécen nun serbir para nada, manda cartamança antendé-las: segredos subre l’eiterna eiboluçon de la spéce houmana.
(português) GADO DE AFETOS
Os que me seguem mais de perto, sabem que valorizo muito as “coisas que não serem para nada”, mas isso são outras conversas.
Nasci num tempo e num sítio onde a Idade Média durou quase até ao fim do terceiro quartel do século XX. Fiz-me homem nesse sistema.
O meu pai e a minha mãe eram camponeses, como camponeses eram os noventa e nove por cento das pessoas da aldeia e da Terra de Miranda.
A maioria da gente de hoje não terá muita informação subre o que é a civilização do campesinato: mas ela foi global e durou mais de mil anos.
Em Portugal estendeu-se entre a guerra da reconquista cristã que começou por volta do ano 700 no século VIII e 1980 no século XX. Hoje, para o mal e para o bem, somos o que somos, porque essa sociedade nos trouxe até aqui.
Foi nesse sistema civilizacional que nasceram a quase totalidade das nossas aldeias.
Um lugar crescia enquanto centro de segurança de um termo que o envolvia. Dentro desse termo a comunidade que lá vivia era autárcica: quase nada entrava, quase nada saía. Bastavam-se a si próprios com o que tinham e produziam. Havia tempos de mais penúria e outros de maior desafogo, consoante os anos vinham melhores, ou piores! Era bom que houvesse alguns excedentes que depois se trocariam por ferro para produzir as alfaias de trabalho.
Um camponês havia de ter um pouco de tudo, porque de um pouco de tudo precisava, para fazer passar o ano à sua família alargada: cereais, castanha e mais tarde a batata - hidratos de carbono como base alimentar; carne dos animais que criava e caçava, como proteína; lenha como energia que a casa precisava; estrume como fertilizante; animais de porte como força de tração; horta de vegetais e alguns frutos como complemento de diversidade alimentar; azeite como gordura vegetal e o vinho como droga social. Também os animais que criava e os vegetais que plantava lhe forneciam leite, peles e as fibras que precisava, para fazer queijo, couro e os seus agasalhos: a lã e o linho. E tudo era preciso guardar, transformar e conservar, durante todo o ano, para que nada faltasse até a próxima colheita: tulhas libres de humidades e de luz; porco e vaca conservados em fumeiro e sal. Ovelhas, cabras, galinhas, patos, coelhos e perus vivos para matar quando fosse preciso.
Tudo havia de ter uma função bem concreta, para que não se estivesse a criar coisas que dessem mais prejuízo que lucro: estórias de sustentabilidade. É aqui que entram os cães e gatos. Enquanto os primeiros asseguravam funções de caça e guarda do gado, os segundos ocupavam-se da maior peste que poderia haver dentro duma casa cheia de comida: ratos e leirões. Os carinhos trocados com todos os animais da casa já se iam mostrando à janela, mas ainda não ocupavam a parte central da relação.
Como em todas as famílias, em casa dos meus pais havia de todos esses animais: mulas, burros, galinhas, perus, coelhos, cães, gatos e mil garavatos. Estes últimos nunca percebi o que eram, mas haviam de ser os ratos, leirões, chismes, percevejos, carraças, caruncho, polilha, lombrigas, pulgas e piolhos, porque eram mesmo muitos!
Claro que enquanto fui criança, principalmente os cães e gatos, sobretudo quando eram pequerruchos, me fascinavam. Mas logo a racionalidade dos pais nos punha a ferro de letra:
- O lugar dessa criação é na rue e no estábulo e a comerem o que sobrar depois de todos terem comido: ossos, espinhas, peles e alguma vianda com uma côdea amolecida que os porcos bem agradeceriam.
Os tempos mudaram, porque o mundo nunca perdeu essa velha mania de girar todos os dias.
O meu filho conheceu por pouco a civilização do campesinato, e agora, como todos nós, faz parte da civilização global. Vive ele, a namorada e a sue cadela Xara, num sexto andar em Madrid.
Quando nos vem visitar traz sempre a cadela, e a mia cunhada Adília, que é nossa vizinha e nunca deixou de viver na sociedade do campesinato, pergunta-lhe:
- O Thibaut, a cadela é muito bonita, mas para que queres tu essa inutilidade: todos os dias a comer, a cagar e a mijar em casa, sem dar lucro nenhum. Não tinhas tu a culpa! Se te lixasses?
- Isto é um gado de afetos Adília. Faz-nos muita companhia. Dá-nos muitos carinhos e alegrias. Responde-lhe o meu filho.
- Gado de afetos! Nunca em dias da minha vida tinha ouvido semelhante coisa!? Isso não serve para nada Thibaut. Ainda se fosse um porquinho como o que eu tenho no estábulo!
Será por vivermos em maior desafogo que as coisas evoluíram desta maneira? Será porque as pessoas hoje precisam mais de afetos? Será porque os cães e gatos de agora estão em melhores condições para dar estes afetos?
E nas democracias modernas setores da política dedicam-se a conquistar o manancial dos votos que vêm desse setor.
E as reportagens das guerras de hoje atestam que podes deixar tudo para trás, mas o gado de afetos, tem que seguir com cada um dos refugiados até onde seja preciso!
Coisas que parecem não servir para nada, é muito difícil entendê-las: segredos sobre a eterna evolução da espécie humana.
