Rescaldo de las Eileiçones Outárquicas na Tierra de Miranda
Cada qual bei l mundo de la sue jinela. Assi, cumo nun poderie deixar de ser, cula sue çapata – ls mius eidiales –, ls sous tranqueiros – ls mius balores i percípios – i la sue troça – la mie postura i la mie prática de bida –, tamien you tengo la mie. Pa la abrir un cachico i quedardes assi cula éideia de cumo eilha ye, aporbeito para, tal cumo hai yá algun tiempo s’ampeçou a fazer, deixar eiqui la mie declaraçon d’antresses: ambora nunca tenga melitado an qualquiera fuorça política, solo ũa beç nun botei a la squierda i na mesma fuorça. Mas nun cuideis pori que fui por outra rezon que nun fusse tener que, debido a la “Covid-19” i contra mie buntade, m’abstener nas Eileiçones Presidenciales de 2020.
Aclaradas las cousas i pa que nun dígades, pori, que bos quiero anganhar, tengo tamien que bos amostrar l miu spanto quando beio l miu i ls outros dous cunceilhos bezinos, que tamien fázen parte de la Tierra de Miranda, cuns quantos botos a mais – digo “quantos”, pus, zafertunadamente, muitos nun son, que nun hai alhá pessonas subrecientes pa podermos dezir doutra maneira – nũa fuorça política, aqueilha que, cun maior ou cun mais pequeinha cfréncia de botos, an todos eilhes, ganhou las Eileiçones Outárquicas 2021.
Yá se sabe que cada un come de l que le gusta ou de l que pónen na mesa ou inda l que, dun modo ou doutro, l’oubrígan a comer. I, cumoquiera, tamien bós oubis dezir q'hai muitas maneiras nada lhimpas de l fazer: la pormessa d’arranjar un ampreguito pa l filho ou la filha; un jeitico eiqui ou eilhi; cerrar ls uolhos a qualquiera cousa que l’antresse mas que nun steia bien cumo debie de star; ũa prendica que le dé jeito; i, se calha até, recebir algun denheiro an troca de l boto. Anfin – spero you que nun seia l causo na Tierra de Miranda –, son bárias las maneiras d’anfluenciar alguns botantes, aqueilhes que, sin qualquiera dúbeda ou scrúpalos, se deixan cumprar por dieç reis de nada.
Claro stá que, seia quien fur que las siga, estas práticas manhosas nada ténen de democráticas...
Bamos, anton, a ber ls númaros de todo l Paíç i de ls três cunceilhos a que, hai alguns seclos, le cháman la Tierra de Miranda:
I. Cumo podereis ber, cumparando ls números de Botantes nas Outárquicas 2021, de Anscrebidos ne ls Cadernos Eileitorales i d’Habitantes, cunsante ls Censos 2021, ne ls trés cunceilhos de la Tierra de Miranda i ne l Paíç, hai algũas cousas que mos sáltan lhougo a la bista:
1. Al cuntrairo de l total de l Paíç, ancluindo las Regiones Outónomas, l númaro d’Anscrebidos ne ls Cadernos Eleitorales de ls trés cunceilhos de la Tierra de Miranda ye bastante mais alto que l d’Habitantes;
2. Ne l cunceilho de Bumioso, mesmo sendo l mais pequeinho de ls trés, la çfréncia antre l númaro d’Anscrebidos i l d’Habitantes ye la maior: cerca de la terça parte de la soma de las cfréncias de ls trés i bastante mais alta que la de l cunceilho de Miranda.
II. II. Sabendo nós que ls Cadernos Eileitorales nun cuntémplan ls menores de 18 anhos ne l rol de ls Anscrebidos i q'assi, an todo l Paíç, ancluindo las Regiones Outónomas i todos ls cunceilhos, l númaro d’Habitantes deberá ser bien maior que l d’Anscrebidos ne ls Cadernos Eleitorales de las Outárquicas 2021, hai algũas preguntas que mos bénen a la cabeça:
1. Cumo se splica que, ne ls trés cunceilhos de la Tierra de Miranda, l númaro d’Anscrebidos seia maior que l d’Habitantes?
2. Porquei tan grande çfréncia antre l númaro duns i doutros, subretodo ne l cunceilho de Bumioso?
3. Que se passará culs Cadernos Eleitorales de ls trés cunceilhos?
4. Que mais se passará anton nestes cunceilhos?
4.1. Seran pessonas que yá se morrírun, mas qu’inda stan Anscrebidas ne ls Cadernos? I será que se morrírun assi tantas pessonas an cada un del trés cunceilhos, mas subretodo ne l de Bumioso?
Ne l miu modo de ber, hai maneira d’acabar cun este porblema que afeta tamien l restro de l Paíç. Bondará ser mudada la lhegislaçon de modo a que la atualizaçon outomática de ls registros anformáticos respeitantes als Cadernos Eileitorales de todas las Eileiçones seia melhorada, passando a lhigar i a reculhir, outomaticamente, ls dados de l Registro Cibil. Assi, quando qualquiera moça/o cumplete 18 anhos, deberá passar a ser, outomaticamente, acrecentada/o ne ls Cadernos Eileitorales de l sítio adonde mora, cumo tamien, quando algũa pessona se muorra, deberá passar a ser, outomaticamente, retirada de ls Cadernos Eileitorales de l sítio adonde moraba.
Será que muitos de ls Anscrebidos son eimigrantes? Ou seran, pori, pessonas que móran noutros cunceilhos mas dan la sue morada cumo sendo nun de ls de la Tierra de Miranda? Será que, al cuntrairo de l que se diç tener acuntecido nas eileiçones d'hai quatro anhos, desta beç, ls que móran fuora de l cunceilho ou de l Paíc nun fúrun alhá botar? Ou serie, pori, por tenéren quaije la certeza de quien iba a ganhar i nun queréren dar nas bistas, que, desta beç, nun stubírun pa s'ancomodar a amanhar transportes pa ls Anscritos que nun bíben ne l Paíç i, assi, tamien nun les oubrigar a tener que fazer grandes biaiges pa lhá íren a botar?
Assi i todo, hai alguns dies, preguntando a un amigo la rezon de la grande çfréncia de botos antre las dues listas de candidatos mais botadas nũa fraguesia de l cunceilho de Miranda, respundiu-me el que s'oubiu dezir que tenerá sido debido a cerca de 90 pessonas dũa coincida eitnia – cumbenirá dezir que nada tengo contra qualquiera eitnia! – tenéren ido de fuora, da peto, pa lhá botar.
Mal bai la Democracie de l Paíç se fur berdade haber candidatos que, cumo s'oube dezir, cómpran alguns botos i alguns Botantes que nun s'ampórtan de ls bender por ũa cousica de nada! Claro que l mal nun stá an ser por pouquito, mas si an bender-se qualquiera boto seia pul précio que fur. Las Eileiçones son un assunto mui sério i nó un leilon de botos para ber quien dá mais pul sou!...
Falta dezir que, ne ls trés cunceilhos de la Tierra de Miranda, todos ls candidatos eileitos pa la Cámara i la maior parte de ls candidatos eileitos pa la Assembleia Munecipal i pa las Assembleias de Fraguesia/Ounion de Fraguesias son de la mesma fuorça política (PSD), sendo la maior çfréncia de botos an relaçon a la sigunda mais botada (PS) ne l cunceilho de Bumioso (35,11%), la mais pequeinha ne l cunceilho de Mogadouro (2,39%) i, a meio destes dous, l cunceilho de Miranda de l Douro (13,03%).
Parabienes a todas/os quantas/os, nas Eileiçones Outárquicas 2021, sin outelizáren niũa manha, botórun i a las/als candidatas/os que fúrun lhimpas/os, dignas/os i justas/os bencedoras/res nas Assembleias de Fraguesia/Ouniones de Fraguesias, Assembleias Munecipales i Cámaras Munecipales de la Tierra de Miranda i de l restro de l Paíç. Parabienes tamien a las/als restrantes candidatas/os que nun fúrun eileitos. A bien de cada Fraguesia, de cada Munecípio, de l Paíç i de la sua gente, buono mandato a cada ũa/un destas/es eileitas/os pa ls mesmos uorganos de poder. Ah!... i que niũa/niun se squeça de que naide ye eiterna/o i que, cumo ye questume çcuitar-se por ende, se lhembre: "Nun hai mal que siempre dure nin bien que nunca acabe!..."
Subre la mesma matéria, talbeç balga la pena ber i oubir l que l jornalista Manuel Carvalho, diretor de l jornal Público, mos diç ne l seguinte bídeo:
