Zafio als Outarcas de Bumioso: Recuperar i Apuiar la Recuperaçon de l Património Eideficado de las Poboaçones de l Cunceilho
Agora que stamos a pouco mais d’ũa semana de las eleiçones pa la Junta de Freguesie ou Ounion de Freguesies i pa la Assembleia i Cámara Munecipal, ye mie oubrigaçon lhembrar i pedir ũa cousa als candidatos a outarcas de la tierra an que naci – Angueira, adonde daprendi a falar, purmeiro, an Mirandés, i, apuis, na eigreija i na scola, a falar i a screbir an Pertués – i de l miu cunceilho, ou seia, de Bumioso: deixai-bos, mas ye. dessas cousas de dar nas bistas i d'anchir ls uolhos, mas que nun antréssan a naide nin dan para nada.
Botai-bos, mas ye, a fazer l que balga mesmo la pena pa las poboaçones, pa l cunceilho i, subretodo, pa l bien-star de las pessonas q'alhá bíben. Por eisemplo, aporbeitar bien l’auga de las anchenas d’eimbierno de ls três rius – Angueira, Maçanas i Sabor – i de ls ribeiros que neilhes ban a desaugar i recuperar i apuiar la recuperaçon de l património tradicional eideficado: çudas, molinos, casas de molineiro, casas de bibir de las pessonas d’antigamente, palombares al redor de las poboaçones i corriças q'hai pul termo i q’ampéçan, ou stan yá mesmo, a sbarrulhar-se.
Bien sei que a toda la gente le gusta amostrar obra que se beia. Mas, buona figura fai i, cumo tal, proua debe tener quien faga l que mais antressa a las pessonas i a las poboaçones i que son mais neçairas ne l cunceilho.
Subre la custruçon de represas d’auga i charcas i la reparaçon de las çudas i de las caliendras, screbi na semana passada. Hoije, bou anton a screbir subre ls molinos i algũas casas de bibir d'Angueira: las de molinheiro, qu'éran ne l termo i mesmo al lhado de ls molinos de las Trés Ruodas, de Terroso i de la Senhora, i d'antigas casas de bibir na poboaçon.
De ls siete molinos que dantes habie an Angueira, réstran inda quatro: l molino de la Senhora – adonde, nũa piedra de la parede, porriba de l banco de piedra al lhado de la puorta d’antrada, se lei 1247 – i l molino de las Trés Ruodas ou de ls Lucas, que son ls mais antigos; i ls molinos de Terroso i de Telhado, este un cachico arriba de la Fuonte Santa. Trés deilhes ténen, al lhado, la casa de l molineiro, cada qual cun dous pisos: a la de l molino de las Trés Ruodas yá solo le réstran las paredes de fuora; la de l molino de Terroso, inda cun buono telhado, paredes, puorta i jinelas; la de l molino de la Senhora, ũa buona i grande casa de bibir de l molineiro, apegada a outra cun loja i palheiro para albergar las bestas, mas q’ampeçan yá a amostrar seinhas d’abandono.
q'amanáçan rúina, hai que, quanto antes, botar-les la mano. Cuido que, quando ls duonhos nun quérgan ou nun puodan recuperá-las, anquanto la Cámara i la Junta nun apuiáren la sue recuperaçon, melhor será que las póngan a la benda, a ber s’aparece quien querga recuperá-las. Doutro modo i se nada fur feito, mais die menos die, staran todas sbarulhadas, ne l chano i sin qualquiera préstimo, serbentie ou porbeito para naide.
An bárias cidades, hai algũas casas de gente probe, pequeinhas i apegadas ũas a las outras, adonde móran bárias famílias. Nun dando diretamente pa la rue, ls moradores destas casas partílhan l mesmo i único acesso até la puorta d'antrada. Talbeç por séren un cunjunto de casas tan junticas i apartadas de las outras al redor, cháman-le “ilhas”. Mas, an Angueira, adonde tamien hai destas casas que, por nun dáren diretamente pa la rue, para antrar neilhas, hai que passar por ũa caleija apertada. Cumoquiera por isso, chamámos-le “caleijas”.
Se, an tiempos, habie an Angueira mais algũas destas caleijas, hoije an die, inda cunto oumenos nuobe: quatro ne l bairro de Sante Cristo i cinco ne l bairro de Saiago. Dantes, por trás de la casa de l tiu Rilo i a sul de la casa de bibir de ls Turiels – adonde, agora, Zé Luís Turiel ten la garaige de las máquinas –, habie inda outras casas todas cula puorta birada pa l pátio qu'eilhi habie c'ũa parede al redor i solo c'ũa antrada de la rue. Fui nũa destas casas que, apuis de l tiu Bicha s'apartar de la tie Marie, la sue tie passou a morar culas filhas. Mesmo al lhado, habie inda outra caleija que, passando pula frente de la puorta de l forno de cozer l pan de l tiu Albinico, daba pa l'antrada sul de l curral, culs palheiros i loja de la cria de ls Turiels i pa la casa de bibir de la tie Dumecília i de l tiu Stroila.
Mas, nun cuideis que todas las casas de las caleijas d’Angueira éran de gente probezica! Oumenos dues deilhas – ũa que queda antre las casas de l senhor Dioniç, de l tiu Antonho Carai, de la tie Beatriç Guerrilha i de l senhor Zé de la Moca i outra antre las casas de l tiu Chico Regino i la de Zé Guerrilha i las de l senhor cabo Xabier, ambas a dues ne l bairro de Saiago – mais s’asparécen culs cundomínios cerrados de la gente fina de las cidades.
Agora, la maior parte de las casas destas caleijas d’Angueira stan al abandono i ampéçan a amanaçar quedar, ou stan yá mesmo, an rúina: la de ls Casetos – adonde, antes de eimigráren, pa lhá desta família, bibírun las de l tiu Chapaça i de l tiu Cisnando i, apuis, la de l tiu Agrepino Albardeiro, l gaiteiro d’Angueira – i la de ls Galharitos, ambas a dues an Sante Cristo; la de ls Cristos, la de ls Pandeirelos, la de la tie Janeira i la de ls Balazaros, todas estas ne l bairro de Saiago. Ne l bairro de Sante Cristo, hai inda outras – adonde éran las casas de bibir de l tiu Zé Pitascas i de la tie Adozinda Cacaitas i, apuis, la sue filha, Sabel Cochinica, an que las casas stan a ser recuperadas puls filhos desta; i outra pul lhado de riba de la capielha de Sante Cristo, adonde era la casa ls quinteiros de l tiu Arán i la de la tie Machaca, i qu’inda nun será deficel recuperar ambas a dues.
Cumo podeis ber puls retratos, ye ũa pena qu’estas i muitas outras casas de bibir, assi cumo tamien ls molinos i las casas de l molinheiro stéian ne l stado an q’hoije stan.
Bendo l stado an que stá este património, hai ũa pregunta que nun me sal de la cabeça: haberá algũa rezon para la Cámara de Bumioso ambriar mais de € 1 100 000 na custruçon de mais dous pabelhones multiusos ne l cunceilho? Ye muito denheiro, mas beremos quanto custaran, pori mais, quando acabar la custruçon! Para mais, inda hai que ls eiquipar i, subretodo, mantener todos ls anhos, para, apuis, por falta de gente, subretodo de mocidade, quedáren la maior parte de ls dies de l anho a las moscas! Ye que, mesmo que cada un de ls dous nuobos pabelhones seia outelizado ũa ou dues horas dun die de cada semana i mais treze dies por anho para feiras i fiestas, assi i todo, inda réstran trezientos dies de l anho sin qualquiera outelizaçon! Nun se squeça que yá habie un i, assi, passa agora a haber trés ne l cunceilho que ten cerca de 4 000 habitantes i que la maior parte deilhes son pessonas de muita eidade!
Bós que sodes pessonas anteligentes, cun uolhos de ber na cara, que teneis la cabeça ne l lhugar que ye debido i que bos sirbe para mais cousas q’amostrar l pendado ou poner l chapéu, ora dezie-me alhá: nun bos parece que serie bien melhor que, an beç destes luxos, bizarries i figuraças, la Cámara de Bumioso aplicasse esse denheiro pa reparar las çudas i ls molinos i p'ajudar ls duonhos a reparar este i l restrante património eideficado q’hai an Angueira i nas outras poboaçones de l cunceilho?
A cuntinar assi cumo ten sido até agora, an beç d'atrair gente nuoba, nun staremos a ampuntar mais pessonas para fuora de l nuosso cunceilho i, assi, a ancaminá-lo pa la puorta de l semitério? Seia quien fur l outarca eileito, spero bien que nun tenga, pori, que fazer-le las bezes de cobeiro!
Esta ye la rezon de me deregir desta maneira als candidatos a outarcas i de les pedir: botai-bos, mas ye, a fazer l melhor que podirdes para rebitalizar l cunceilho de Bumioso i las sues binte i dues poboaçones!
Bá, bamos alhá! L cunceilho, las sues poboaçones i toda la sue gente carécen i merécen todo quanto i l melhor que podirmos fazer por eilhes!
Sugiro que leia o texto a meia voz, o que lhe poderá facilitar a compreensão do mesmo.
Se quiser ver as fotos que ilustram o texto, carregue no "link":
