An ne próssimo die 28 de Márcio, deimingo, pulas nuobe i meia de la nuite, an ne Filo-Café D'Ouro, la Sociedade Guilherme Cossoul lhebará a cabo l'apersentaçon de l nuobo lhibro de l scritor mirandés Fracisco Niebro. L títalo de l lhibro ye «Cula Torna Ampuosta, Quienquiera Ara». Ye un lhibro de poesie screbida an mirandés, mas cula traduçon an pertués. Cunforme diç l'ourganizaçon de l eibento, ye la purmeira beç que ye eiditado, an Pertual, de raiç, un lhibro culas dues lhénguas nacionales: l mirandés i l pertués. La traduçon pa la lhéngua fidalga la fazírun Alberto Augusto Miranda i Carlos Ferreira. L'apersentaçon de l lhibro la fazerá Alberte Gómez Bautista, natural de la Galízia, scritor de lhéngua galhega i porsor de lhéngua castelhana an n'Anstituto Cervantes de Lhisboua.
L cumbite pa l eibento este trai este testico, mi guapo i curjidoso:
«Anque se saba, hai an Pertual dues lhénguas.
Las dues nacidas de l lhatin.
L que ye pouco pa tanto milhon.
Queda a saber-se que la maiorie nun ten lhéngua própria.
Anque se saba, diezenas de lhénguas zde l crioulo al árabe, zde l breton al chinés, zde l tarahumara al francés-midi, soln hoije la melhor música de Lhisboua.
Podie-se falar an hiperlhéngua.
L mirandés lhieba a cabalho (l burro mirandés bai camino de la stinçon) la lhéngua asturiana i la lhéngua lheonesa.
A Liste!»
Mais anformaçones poderan ser sacadas pul númaro de telmoble 965817337.
