Ls Gueiteiros de l Praino Mirandés ajuntórun-se na «Rezosa», ua eineciatiba que tubo lhugar an Fuonte Aldé, cunceilho de Miranda de l Douro, an la tarde i la nuite de l redadeiro die 21 de Dezembre. Yá fai seis anhos que este juntouro acuntece.
Astanho, l tema de l juntouro fui la daprendizaige de las danças tradecionales mirandesas. Poro, la fiesta ampeçou cua «oufecina» de baile mirandés, que fui dada pul grupo de Dues Eigreijas. Seguiu-se ua ronda culs gueiteiros pul pobo i ua cena pa todos.
De nuite, l palco recebiu las atuaçones de l Grupo de Dues Eigreijas, de la Scuola de Gueiteiros de Miranda de l Douro, i de Paco Diez, un gueiteiro que bieno de Spanha. De suorte que todos estes gueiteiros animórun la fiesta pula nuite andrento até la purmanhana.
Cumo siempre, la Rezosa fui ourganizada puls Galandum Galundaina i pula Associaçon Cultural i Recreatiba de Fuonte Aldé.
