Bai a tener lhugar hoije, die 8 (uito) de Jineiro de 2004, ne l restourante de las Pecinas de l Clube Académico, na cidade de Bergança, l Juntouro-Cumbíbio de ls Mirandeses que bíben nesta cidade. L'ourganizaçon ye de l'Associaçon de Mirandeses an Bergança, que yá ten mais de binte anhos zde que naciu ne l anho 1982. L'associaçon stubo un cachico adrumecida durante algun tiempo, mas agora ancuontrou alguns moços naturales de l cunceilho de Miranda de l Douro i que bíben an Bergança, moços esses chenos de fuorça pa alhebantar esta associaçon i torná-la mais atiba i besible.
L juntouro ampeça a las siete de la nuite cul acolhimiento an família mirandesa. Açpuis, a las siete i meia de la nuite, ampeçará ua Assemblé General de l'associaçon, durante la qual ls sous sócios, bielhos i nuobos, poderan anchir las fichas de sócio. Nun será neçairo tornar a pagar las quotas anuales. Será tamie çcutido i botado l Plano d'Atebidades de l'associaçon pa l anho 2004. Apuis, haberá l'eileiçon pa ls nuobos membros de la Direçon i de ls outros uórganos sociales. Por fin, l'Assemblé General acabará cun outras anformaçones ó temas subre ls quales las pessonas quérgan çcutir.
Spera-se que la cena ampece a las uito de la nuite. L'eimenta ye cumpuosta por:
- Antradas d'alheiras i chouriça assada;
- Caldo;
- Puosta Mirandesa;
- Bino de la casa, çumos i augas minerales;
- Subremesas bariadas;
- Café.
L précio de la cena ye de 11 ouros.
Apuis la cena, haberá atebidades culturales i recreatibas de la tradiçon mirandesa. L juntouro deberá de chegar al fin pulas dieç de la nuite: "Dius mos deia buonas nuites i anté la próssima beç"!
