Ne l redadeiro die 28 dOutubre, pulas 4 horas de la tarde, nOunibersidade dOubiedo, cidade capital de las Astúrias, region outónoma de l Stado Spanholo, tubo lhugar ua palhestra dada por Amadeu Ferreira, porsor cumbidado de lOunibersidade Nuoba de Lhisboua i persidente de lAssociaçon de la Lhéngua Mirandesa, i ua de las pessonas que mais scribe an mirandés. L títalo de la sue palhestra fui «L Dreito Lhenguístico Pertués i la Lhéngua Mirandesa». La palhestra era parte de las «XXII Xornaes Internacionales dEstudiu» («23.ª Jornadas Anternacionales de Studo», nourtografie asturiana), que fúrun ourganizadas pula Academie de la Lhéngua Asturiana antre ls dies 27 i 29 d'Outubre dastanho.
Amadeu Ferreira falou de l dreito de las lhénguas an Pertual i, nesse cuntesto, de la situaçon jurídica de la lhéngua mirandesa. El cuida que hai an Pertual muitas eideias arradas subre esse porblema, puis muita giente cunfunde las proclamaçones guapas, que sónan bien als oubidos, cula rialidade de las lhénguas tal cumo las fálan las pessonas. Nesse sentido, Amadeu aporbeitou para fazer un baláncio de ls cinco anhos an que stá an bigor la lei de loufecializaçon de la Lhéngua Mirandesa. La cuncluson a que el quiso chegar fui mui simples, yá que ye sabida por todos: nunca se fazírun reboluçones cun leis. Las leis crían cundiçones para anterbenir i modeficar la rialidade, mas solo por si nada puoden fazer. Leideia de Amadeu ye que hai dues cundiçones eissenciales que dében de ser cumpridas para que ua lei nun seia «lhetra muorta»: la purmeira cundiçon ye que haia buntade política de aplicar la lei; la segunda cundiçon ye que las pessonas aporbéiten las cundiçones que essa lei le puode ouferecer. Assi, Amadeu Ferreira cuida que l mirandés stá nun punto de buolta i tanto puode caier para un lhado cumo para outro, quier-se dezir, tanto puode cuntinar l sou zambolbimiento saludable an todos ls nibles (ansino, lhiteratura, amprensa, eiquenomie, etc.), cumo puode quedar-se cada beç mais cumo ua lhéngua arrinconada, que solo ls bielhos de las aldés mirandesas la pálran. Para el, l camino que la lhéngua mirandesa poderá seguir nun depende de la lei, mas de l poder político i, porriba de todo, de ls mirandeses. Anque todo esto puoda parecer pessimista, Amadeu dixo que l sou antusiasmo ye l mesmo de siempre, mas niun antusiasmo puode durar se nun stubir bien assentado nun bun coincimiento de la rialidade.
Durante las «Xornaes», tamien houbo ua quemunicaçon de Xosé Nel Comba Paz, porsor de lOunibersidade dOubiedo que stubo ne l purmeiro Juntouro Anternacional de Lhénguas Románicas Minoritairas, que tubo lhugar ne l redadeiro berano na sede de la Frauga - Associaçon pa l Zambolbimiento Antegrado de Picuote. L título de la quemunicaçon de l porsor Nel Paz fui «Los Alcuños nos autores asturianos» («Las noemadas nos outores asturianos», dacuordo cula ourtografie asturiana).
L porgrama de las «Xornaes» puode ser ancuntrado ne l andreço web http://www.academiadelallingua.com/xxii_xornaes.htm .
