Debagar se bai al longe, diç l ditado. La cunta ye nunca parar. Assi, tamien, la literatura mirandesa, agora anriquecida cun un nuobo libro i un nuobo outor. Las dues cousas son de assinalar, cumo de grande amportança. Mas tamien ye amportante dezir que esta ye la purmeira obra mirandesa dedicada al tema: lhonas, lindainas i cuontas de camino. Trata-se dun trabalho de recuolha, ourganizaçon i ampeço de l studo dua parte de la literatura popular que tem grande amportança na caratelizaçon dun pobo i que até agora staba por abordar. Asperemos que l eisemplo se multeplique i nuobas einiciatibas aparéçan ne l mesmo domínio.
Este libro ten inda outra nobidade: ben acumpanhado dun CD cula leitura de las cuntas an mirandés, uas na pernúncia de l mirandés central (cula boç de Balbina Mendes) i outras cula pernúncia sendinesa (pulas bozes de Carlos Ferreira, Manuol Ferreira i Marília Almendra). Para alhá de l'amportança pedagógica deste CD ye possible ir oubindo uas lhonas mirandesas i dar uas risadas balientes, anquanto se faç outra cousa. Cuido que ye la purmeira publicaçon de sonidos mirandeses an grande scala, sin cuntar culas eidiçones musicales. Assi, puode-se oubir falar mirandés sin tener que ir a la Tierra de Miranda.
Nun puode squecer-se que l libro stá eilustrado cun ougarielhas de Manuol Ferreira, que ban a star spuostas ne l mesmo sítio de l lançamiento de l libro.
L libro bai a ser apersentado por Antonho Bárbelo, tamien el scritor de mirandés.
AF
