Bai a ser apersentado manhana, die 16 de Dezembre, a las seis de la tarde, ne l «foyer» de l Triato Académico Gil Vicente, an Coimbra, l lhibro «Teatro Popular Mirandês: Textos de Cariz Profano» («Triato Popular Mirandés: Testos de Cariç Profano»).
Leidicon deste lhibro, tan amportante pa l registo de la Cultura Tradecional Mirandesa, ye de la respunsablidade de l GEFAC - Grupo de Etnografia e Folclore da Academia de Coimbra («Grupo d'Eitnografie i Folclore de lAcademie de Coimbra»). Este grupo ampeçou a trabalhar na recuolha de quelóquios triatales mirandeses zde Nobembre de 1974. Alguns desses quelóquios fúrun apersentados pul grupo an Coimbra i noutras cidades de l nuosso paiç. Assi i todo, l grupo cuidou que yá serie altura de botar todo este apanhado de la cultura popular de la Tierra de Miranda nun lhibro, pa que assi quedasse screbido pa que las geraçones feturas de pertueses i mirandeses pudíssen coincer un cachico mais de las sues raízes. I assi naciu l lbribo, que ye solo l purmeiro bolume antre outros que haberan de benir a ber la lhuç de l die.
Na sesson dapersentaçon de l lhibro, haberá bárias palhestras: de l Porsor João Maria André (Faculdade de Lhetras de lOunibersidade de Coimbra, i Diretor de l Triato Académico de Gil Vicente), de l Porsor José Oliveira Barata (Faculdade de Lhetras de lOunibersidade de Coimbra) i de l Dr. José Borges Pinto (antigo sócio de l GEFAC i ua de las pessonas respunsables pula recuolha de ls testos).
Leidiçon deste lhibro recebiu l apoiu de bárias antidades oufeciales: Cámera Munecipal de Coimbra, Fundaçon Calouste Gulbenkian, Gobierno Cebile de Bergáncia, Gobierno Cebile de Coimbra, INATEL, Anstituto Pertués de la Mocidade, Menistério de la Cultura, Region de Turismo de l Nordeste Trasmuntano i Reitorie de lOunibersidade de Coimbra. Bei-se que la Cámera Munecipal de Miranda de l Douro nun stá nesta lhista, mas tamien nun fui possible saber se l GEFAC pediu-le la sue mano.
Leidiçon de l lhibro ye de l'Eiditora Almedina, i puode-se mercá-lo ne l portal de l'ampresa: http://www.almedina.net . Ademais, puode-se sacar mais anformaçones subre l lhibro esse ne l andreço web http://www.ci.uc.pt/gefac/livro/livro.html .
