L GEFAC - Grupo de Etnografia e Folclore da Academia de Coimbra («Grupo d'Eitnografie i Folclore de lAcademie de Coimbra») - bai a apersentar l lhibro «Teatro Popular Mirandês: Textos de Cariz Profano» («Triato Popular Mirandés: Testos de Cariç Profano»), hoije, die 17 de Jineiro, na lhibrarie «Ler Devagar» (http://www.lerdevagar.com/ ), an ne Bárrio Alto, an Lisboua. Assi, a las nuobe i meia de la nuite haberá ua ronda cun gaitas de fuolhes pulas rues i caleijas de l Bárrio Alto, até la lhibrarie aqueilha. Eili, tenerá lhugar ua pequeinha repersentaçon triatal cun testos de Triato Popular Mirandés, na fin de la qual será apersentado l lhibro. Lapersentaçon deste lhibro cuntará cun las palhestras de José Pedro Caiado (Persidente de l Cunseilho Centífico de la Scuola Suprior de Triato i Cinema de Lisboua) i Paulo Raposo (porsor de l ISCTE - Anstituto Suprior de las Céncias de l Trabailho i de lAmpresa).
Esta eineciatiba serbirá pa pormuober leidiçon dua amportante obra de l triato popular i de leitnografie an Pertual. Ademais, l lhibro «Teatro Popular Mirandês: Textos de Cariz Profano» puode ser mercado pula Anternet, an ne portal de la lhibrarie Almedina (http://www.almedina.net/ ), adonde l sou précio ye de 30 ouros. Assi i todo, mais anformaçones poderan ser sacadas de l portal de l GEFAC: http://www1.ci.uc.pt/gefac/ .
