La rádio nacional RDP Antena 1 bai a eimetir, an direto, zde l Ouditório Munecipal de Miranda de l Douro, l sou mi coincido porgrama «Feira Franca», que nessa altura bai a falar subre la Tierra de Miranda. L porgrama bai pal aire ne l próssimo Deimingo, die 11 de Jineiro, ampeçando a las 10 (dieç) de la manhana. Poderan-se scuitar ls sonidos de las gaitas de fuolhes, tocadores de caixas i bombos, al passo de las danças de ls Pouliteiros. Esta eimisson de l porgrama pormete «diabros a suolta, cheiros de la Fiesta de ls Rapazes que yá se fui i de ls Antruidos que inda bénen por ende. Cun ganas de chouriça, de puosta i de bulho cun cascas».
L'eimisson de l porgrama «Feira Franca» poderá ser scuitada n'Antrenet, ne l andreço http://www.rdp.pt/.
L porgrama «Feira Franca» ye eimetido tols deimingos, a las 10 horas de la manhana, siempre an direto dalgua qualquiera tierra, lhugar, associaçon ó dun café, adonde se fale pertués (i, ne l nuosso causo, adonde tamien se fale mirandés). L respunsable pul porgrama ye Rui Dias José. L porgrama tamien ten un portal web, cun muita anformaçon subre l porgrama i subre las tierras que yá fúrun besitadas por el. L sou andreço ye http://pwp.netcabo.pt/festa.da.radio/ .
(Que Dius bos lo pague a l'Associaçon Gaita de Fuolhes pula anformaçon! http://www.gaitadefoles.net/ )
